今晚歐聯B組焦點戰，阿仙奴主場硬撼朗斯。阿仙奴今仗有分落袋即出線，你急佢唔急，朗斯一向守強於攻，作客更加唔敢輕舉妄動，2.5球細盤係最佳選擇。（Now 644周四凌晨4時直播）

阿仙奴依家以9分位居B組榜首，領先燕豪芬及朗斯4分，今場唔輸就肯定出線，不用急於搶攻。

1分夠出線唔使急
而且「兵工廠」近期攻力冇咁銳利，各項賽事近4場入得6球，其中3場開2球或以下，包括日前聯賽作客賓福特，直到完場前先靠後備入替嘅夏維斯頭槌建功險勝1比0，兩翼布卡約沙卡、加比爾馬天尼利及前鋒加比爾捷西斯，傷愈後明顯未弗番，尤其係對住死守球隊，總係老鼠拉龜。

另邊廂，朗斯想出線梗係要贏波，不過佢哋一向守強於攻，今屆4輪歐聯分組賽入得4球咁大把，各項賽事近6場作客5次開2球或以下，其中3場食白果。朗斯上輪歐聯不敵燕豪芬之餘，前鋒摩根古拿禾古亦領紅牌要坐波監，攻力進一步受削，好彩佢哋防守穩健，近5場僅失1球，今場造訪勁旅阿仙奴，一定會穩陣行先，謀定而後動，2.5球入球細不容錯過。